Një planet fantazmë, me një masë prej 1.5 deri në 3 herë më shumë se Toka, mund të fshihet në sistemin diellor, në brezin Kuiper që shtrihet përtej orbitës së Neptunit.
Këtë e tregojnë simulimet e publikuara në The Astronomical Journal nga dy astrofizikanë japonezë, Patryk Sofia Lykawka nga Universiteti Kindai në Osaka dhe Takashi Ito i Observatorit Kombëtar Astronomik të Japonisë.
Në dekadën e fundit, disa studime kanë hipotezuar ekzistencën e një planeti në skajin e sistemit diellor, i ashtuquajturi Planeti Nëntë.
Ky hulumtim i ri, megjithatë, tregon për ekzistencën e mundshme të një planeti edhe më afër nesh, në brezin Kuiper. Ky rajon në formë unaze përmban shumë objekte të vogla, të tilla si asteroide, kometa dhe pjesë të tjera të vogla të materialit, ndoshta të përbëra nga akulli. Dy astrofizikanët japonezë vunë re se disa prej këtyre objekteve sillen në mënyrë anormale, sikur orbita e tyre të ishte ndikuar nga tërheqja gravitacionale e një objekti më të madh. Të intriguar nga këto të dhëna, ata kryen një sërë simulimesh kompjuterike për të kërkuar një shpjegim.
Rezultatet treguan ekzistencën e një planeti në rripin Kuiper si të mundshme dhe madje gjurmuan një identikit të mundshëm: sipas llogaritjeve ai duhet të kishte një masë nga 1.5 deri në 3 herë më shumë se ajo e Tokës, një pjerrësi prej rreth 30 gradë dhe një orbitë që do të silleni atë në një distancë nga Dielli midis 250 dhe 500 njësive astronomike (një njësi astronomike është distanca që ndan Tokën nga Dielli ynë, e barabartë me rreth 149.6 milionë kilometra)./ ANSA
