Dubai, qyteti më i madh në Emiratet e Bashkuara Arabe, së shpejti do të prezantojë një sistem për njohjen e fytyrave në transportin publik në mënyrë që të rritet niveli i sigurisë. Qyteti tashmë përdor një sistem biometrik të njohjes së fytyrës, por vetëm në aeroportin kryesor.
“Teknologjia është provuar efektive në identifikimin e njerëzve të dyshimtë dhe të kërkuar”, tha Obaid al-Hathboor, drejtor i Departamentit të Sigurisë së Trafikut në Dubai.
Dubai, i cili konsiderohet si “qyteti inteligjent” kryesor në Lindjen e Mesme, ka ambicie të bëhet një qendër e teknologjisë dhe inteligjencës artificiale.
Plani është që së pari të zbatohet në stacionet e metrosë, dhe ai tashmë është testuar në një. Gjatë testimit, forcat speciale simuluan evakuimin e pasagjerëve dhe një nga stacionet e metrosë ku tashmë kishte ndodhur sulmi terrorist u zgjodh për provë.
Gjatë stërvitjes, teknologjia e përparuar u tregua jashtëzakonisht e suksesshme në njohjen e fytyrave të njerëzve që u etiketuan si “terroristë”. Në muajt e ardhshëm, kjo teknologji do të përdoret në të gjitha stacionet e metrosë në Dubai, dhe më vonë edhe në rrugë.
Helmetat e kamerave termike dhe syzet inteligjente tashmë janë duke u përdorur në Dubai për të luftuar koronavirusin, dhe aplikimi i zhvilluar i teknologjisë është një nga bazat mbi të cilat Dubai planifikon të zhvillohet në të ardhmen, raportojnë mediat.