Kompania e telekomunikacionit “Huawei” dhe “Voicewise” nga Universiteti “Tor Vergata” i Romës kanë nisur një projekt-pilot hulumtimi të bioshënuesve të zërit për infeksionin COVID-19 nëpërmjet Inteligjencës Artificiale.
“Studimi klinik lindi me qëllimin për të verifikuar mundësinë e identifikimit të infeksionit COVID-19 përmes analizës së mostrave të zërit, duke përdorur algoritme të inteligjencës artificiale të zhvilluar nga “Voicewise”, shpjeguan studiuesit në një shënim.
“Kjo analizë ka për qëllim, gjithashtu, “matjen” e nivelit të ashpërsisë së infeksionit, si edhe monitorimin e kursit të tij, madje edhe në fazën e shërimit pas daljes nga spitali ose te pacientët në izolim në shtëpi”, vazhdon shënimi.
Në mbështetje të projektit, “Huawei Italia” siguroi pajisjet e nevojshme për eksperimentimin.
Telefonat inteligjentë dhe tabletët “Huawei”, përmes përdorimit të aplikacionit në internet të zhvilluar nga “Voicewise” bënë të mundur regjistrimin dhe përvetësimin e zërave të pacientëve në repartet COVID, duke eleminuar çdo rrezik kontakti me pacientin.
