Zyrtarët amerikanë dhe rusë filluan bisedimet për sigurinë në hapësirë , pasi Uashingtoni dhe Londra akuzuan Moskën se javën e kaluar kishte lëshuar në hapësirë një armë antisatelitore.
Dialogu njëditor për këtë çështje, i planifikuar për muaj të tërë, do të pasohet nga tre ditë bisedimesh për kontrollin e armëve bërthamore midis dy shteteve, në kryeqytetin austriak.
Christopher Ford, ndihmëssekretari amerikan për Sigurinë Ndërkombëtare, akuzoi të Premten se “Moska dhe Pekini tashmë e kanë kthyer hapësirën në një fushë luftarake”.
”Shtetet e Bashkuara të Amerikës do të propozojnë rregulla për sjellje të përgjegjshme në hapësirë, të cilat do të modelohen sipas rregullave aktuale të luftës, që bazohen në parimet e proporcionalitetit dhe humanizmit”, tha Ford për një konferencë për shtyp.
Rusia dhe Kina kanë mbështetur një përpjekje për të ndaluar armët në hapësirë.
Ford tha se Uashingtoni është kundër një propozimi të tillë sepse do të ndalojë sisteme specifike të armëve që janë të vështira për t’u përcaktuar, në vend që të përcaktojë se cilat lloje të veprimeve në hapësirë janë të pranueshme.
Sipas Komandës Hapësinore të SHBA, Rusia testoi një armë antisatelitore në mes të korrikut, e ngjashme me një provë të vendit të kryer në vitin 2017.
Moska e ka hedhur poshtë akuzën.
”Testi përfshinte thjesht një satelit rikonicioni që përdorte pajisje të specializuara për të inspektuar një objekt hapësinor rus në distancë të afërt”, tha Ministria e Jashtme ruse.
“Rusia gjithmonë ka qenë dhe mbetet një vend që është i përkushtuar për çmilitarizimin e plotë të hapësirës së jashtme dhe mosvendosjes së çfarëdo lloj arme në hapësirën e jashtme”, tha zëdhënësi i Kremlinit, Dmitry Peskov.
