Është përmbyllur mbrëmjen e së martës edicioni 2022-2023 i Ligës Amatore të Volejbollit Shqiptar.
Dy skuadrat finaliste ajo e “Vizion Plus” dhe “Old School” u përballën me njëra-tjerën, e në fund, me një diferencë të ngushtë pikësh ekipi i “Old School” arriti të rrëmbente fitoren.
Pasi fitoi bindshëm ndeshjen e parë me rezultatin 3-0, skuadra e Vizion Plus ishte shumë pranë titullit kampion, por dy sfidat e tjera nxorën triumfues rivalet e Old School, të cilët ia dolën të rikuperonin gjithçka e në fund të takimit.
Liga është organizuar me dy grupe A dhe B. Ekipi i Vizion Plus ishte pjesë e grupit të parë, duke patur një rrugëtim të suksesshëm në këtë edicion. Skuadra kaloi me sukses të gjitha fazat, përfshirë këtu edhe ndeshjet e play-off, e duke dhuruar gjithashtu sfida të bukura plot rivalitet.
Volejbolli vazhdon të praktikohet çdo ditë e më shumë si një sport tërheqës, dhe është kjo arsyeja se përse edhe në këtë edicion me organizimin e Federatës Shqiptare te Volejbollit në çdo ndeshje nuk kanë munguar rezultatet dhe rivaliteti me sportistët amatorë që rriten jo vetëm profesionalisht.