Juventus ishte ekipi i parë që preu një biletë për në finalen e kupës së Italisë. Bardhezinjtë u mundën 2 me 1 në Olimpiko nga Lazio, por ishte një humbje e ëmbël pasi skuadra e Alegrit arriti të kualifikohej si pasojë e fitores së pastër 2 me 0 në ndeshjen e parë.
Dueli në kryeqytet me siguri mund të futet tek ndeshjet jo të mira të Zonjës së Vjetër në këtë sezon, ndonëse në fund torinezët festuan kualifikimin. Lazio e Igor Tudor,me një pamje krejt tjetër në raport me ndeshjen e parë, kaloi një moment të vështirë në minutën e 7, kur Kambiazo pati një shans të mirë, dhe pati meritën që reagoi fort duke kaluar në avantazh në minutën e 12 me anë të Tati Kastelanos, i aftë për të shënuar me kokë. Juventus provoi të reagonte por në minutën e 23 Vlahovic u ndal nga një ndërhyrje e portierit grek Mandash.
Ndeshja futet në një faze interesante, ndonëse protagonist janë portierët, sidomos Perin në fundin e pjesës së parë i cili ndali Kastelanos. E megjithatë sulmuesi lacial nuk falë në fillim të pjesës së dytë kur finalizon një aksion të bukur nisur nga Cataldi e vijuar me Felipe Anderson dhe Luis Alberto. Goli i dytë ekuilibron gjithçka, pasi rezultati i përgjithshëm shkoi në 2 me 2.
Pak çaste më vonë bardhezinjtë i shkojnë afër golit, por Marusic largon në vijën fatale tentativën e Vlahovic. Goli i miqve që shmang shtesat vjen në të 82 teksa zëvendësuesi Ueaf shërbeu për Milik i cili shënoi një gol mjaft të rëndësishëm që e mban në lojë Juventusin për trofeun e vetëm sezonal.
Finalja e kupës luhet më 15 maj, por Bardhezinjtë do të presin sonte skuadrën që do të kenë përballë e cila do të dalë nga çifti Atalanta-Fiorentina, me vjollcët që kanë fituar takimin e parë 1 me 0. /vizionplus.tv
