Kreu i Bashkisë së Tiranës, Erion Veliaj priti në një takim kryetarin e Komunës së Mitrovicës së Jugut, Bedri Hamza, me të cilin bisedoi për bashkëpunimin mes dy qyteteve, për krijimin e një kalendari të përbashkët të aktiviteteve për të rinjtë në fushën e inovacionit, artit dhe kulturës, me qëllim nxitjen e përfshirjes së tyre në aktivitetet e “Kryeqytetit Evropian të Rinisë”.
Veliaj shprehu kënaqësinë për vizitën në Tiranë të kryetarit të Komunës së Mitrovicës së Jugut, të cilit i dhuroi edhe simbolin e qytetit, “Kullën e Sahatit”. “Mitrovica është një logo e veçantë në të gjitha kujtimet tona. Është një emër i madh, me sfidat e saj, e këtej lumit dhe përtej lumit, me sfidat e multietnive, me sfidat e një qyteti që duhet të përballojë edhe dëshirën e të rinjve për të lëvizur në kryeqytete më të mëdha. Unë besoj se nën drejtimin tuaj dhe me ekipin tuaj fantastik, ditët më të mira për Mitrovicën janë përpara”, theksoi Veliaj.
Kryebashkiaku shtoi se është me rëndësi që të rinjtë e dy vendeve të krijojnë aleanca dhe të bashkëpunojnë me njëri-tjetrin, për marrëdhënie sa më të mira edhe në të ardhmen.
“Besoj fort se këtë vit që Tirana është edhe “Kryeqyteti Evropian i Rinisë”, mund të kthehet në një platformë që djemtë dhe vajzat e rinj të Mitrovicës të bashkëpunojnë me ata të Tiranës. Ajo që kemi kuptuar është se kur i lidhim që në moshë të re, me bashkëpunime në biznes dhe projekte, ata rriten me këtë frymë bashkëpunimi”, u shpreh ai.
“Për nga mosha ne mund të jemi pak më të mëdhenj se ju, por të gjithë jemi të lumtur që vijmë të mësojmë nga ju”, me këto fjalë iu drejtua krei i Komunës së Mitrovicës së Jugut, Bedri Hamza, homologut Veliaj, ndërsa shtoi se sot të gjithë mburren me Tiranën.
“Sot ne mburremi me Tiranën. Një Tiranë e ndryshuar, që është bërë metropol, një Tiranë të cilën e lakmojnë edhe qendrat më të mëdha të rajonit dhe të Europës. Një Tiranë me një dinamikë dhe zhvillim të madh! Jemi këtu sot që t’i marrim përvoja pozitive nga ju, si në fushën e digjitalizimit, ekonomisë, turizmit, të administratës, të arsimit dhe ju jemi shumë falënderues për shkak se realisht përvojat, projektet tuaja pozitive do të kenë impakt pozitiv edhe tek ne në Kosovë, posaçërisht edhe në Mitrovicë”, përfundoi Hamza.