Këshilli i Ministrave pas mbledhjes së kësaj të mërkurë njoftoi lirimin nga nga detyra të prefektit të qarkut të Kukësit, Ali Hallaçi. Në vend të tij është emëruar Albert Halilaj.
Motivet e shkarkimit të Ali Hallaçit, dyshohet se lidhen me zgjedhjet e reja që do të mbahen në Bashkinë e Kukësit. Ali Hallaçi ka gjasa të jetë alternativa e Partisë Socialiste për të fituar sërish Bashkinë e Kukësit, pas skandalit të ish kryetarit, Safet Gjici.
Ky i fundit u shkarkua nga qeveria pas videos erotike të regjistruar në zyrën e tij. Gjici ndodhet në burg, ndërsa gjykata i ka rrëzuar kërkesën e vazhdueshme për një masë më të butë sigurie.
Ndërkohë, nga opozita ende nuk ka një emër se kush do të qëndrojë në “betejën” e parakohshme për Bashkinë e Kukësit.
