Të enjten Komisioneri Shtetëror i Zgjedhjeve Ilirjan Celibashi do të vendosë për shkarkimin e Fredi Belerit nga posti i drejtuesit të zgjedhur të Bashkisë së Himarës.
KQZ është vënë në lëvizje nga kryetari i FRESH në Himarë Eugen Likaj, i cili pas dënimit në Apel të Fredi Belerit i kërkon Celibashit të zbatojë ligjin e dekriminalizimit dhe të shpallë përfundimin e mandatit të tij si kryetar i bashkisë.
Në rast se Celibashi vendos që Beleri nuk mund të mbajë më detyrën e kryetarit të Bashkisë së Himarës, atëherë vendimi i njoftohet kryeministrit Rama dhe presidentit Begaj. Sipas Kodit Zgjedhor brenda dy ditëve kryetari i shtetit duhet të caktojë datën e zgjedhjeve të reja në Bashkinë e Himarës.
Kodi parashikon gjithashtu se zgjedhjet mbahen jo më parë se 30 ditë dhe jo më vonë se 45 ditë nga data e njoftimit të ndërprerjes së mandatit. Në këtë situatë, zgjedhjet për kryetarin e ri të Bashkisë së Himarës do të zhvillohen brenda periudhës nga 4 gushti në 18 gusht./vizionplus.tv