E gjithë opozita në një zë ka përshëndetur sot veprimet e Prokurorisë së Posaçme kundër Krimit të Organizuar dhe Korrupsionit për inceneratorët, duke i bërë thirrje të hetojë në nivelet më të larta të qeverisjes.
Nga ambientet e Kuvendit, Jorida Tabaku, e cila drejtoi Komisionin Hetimor për Inceneratorët i ka kërkuar SPAK-ut të vendosë para drejtësisë personat me pushtet politik.
JORIDA TABAKU
ISH-KRYETARE E KOMISIONIT HETIMOR
“Guxim duhet të tregojë SPAK që duhet të flasë me integritet për të prekur persona me pushtet. Aferës së inceneratorëve i shkohet deri në fund vetëm kur të pushtetshmit janë përpara drejtësisë. Por edhe bashkimin e çështjeve në një pas të cilës fshihet vetëm një njeri, Edi Rama..”
Hetimin e figurave kryesore të qeverisë e pushtetit lokal ka kërkuar edhe Belind Këlliçi, i cili doli para medias në selinë e PD, në emër të Komisionit të Rithemelimit.
“Pa diskutim ata që kanë hedhur firmën në këtë aferë janë përgjegjës, por ideatorët dhe përfituesit e vërtetë sikundër ne kemi vite që e themi, por e keni parë të faktuar me prova dhe dokumente, me prova autentike këto 6 muajt e fundit që nisin me Edi Ramën, Erion Veliajn, Arben Ahmetaj dhe Engjell Agaçin.”
Kryetarja e LSI, Kryemadhi, deklaroi se SPAK-u është ende në provë për të zbardhur të gjithë aferën e inceneratoreve, pasi përgjegjësit kryesorë sipas saj ende nuk janë para drejtësisë.
MONIKA KRYEMADHI
KRYETARE E LSI
“Do t’ju rikujtoja të gjithë gazetarëve kam denoncuar që do të vinin nga Malta paratë e inceneratorëve për t’u përdorur në zgjedhjet e 25 prillit të vitit të kaluar. Shumë shpejt do të njiheni dhe me atë dosje sepse ato para janë përdorur në mënyrë masive për blerjen e votës në Qarkun e Durrësit.”
Arrestimet për inceneratorët bënë që Lulzim Basha të thyente heshtjen dhe të postonte për herë të parë në rrjetet sociale, që prej momentit që dha dorëheqjen nga posti i kreut të PD. Në këtë postim, Basha thekson se asnjë veprim nuk mund të bëhej pa dijeninë e kryeministrit Edi Rama dhe drejtësia duhet të veprojë edhe mbi liderin e mazhorancës.
