Detaje të reja kanë dalë në dritë në lidhje me ngjarjen e rëndë që ndodhi në Athinë, ku një 20-vjeçare u vra pas një grabitje. Ngjarja tragjike ndodhi në Glyka Nera në orët e para të mëngjesit të 11 Majit.
Mediat greke kanë publikuar një video nga kamerat e sigurisë të një makine që lëviz në mënyrë të dyshimtë në zonë. Këto pamje konsiderohen shumë të rëndësishme për hetimin e vrasjes së Caroline Crouch.
Siç bëjnë me dije mediat, pre e një grabitje të tillë kishte rënë edhe instruktori i bashkëshortit të viktimës në Glyka Nera. Bëhet fjalë për një pilot dhe instruktorin e Babis Anagnostopolous, i cili ka preferuar që të qëndrojë anonim në dëshminë e tij.
I habitshëm është fakti që ai dhe bashkëshortja e tij ishin grabitur në të njëjtën mënyrë në vitin 2018 në shtëpinë e tyre në Alepochori. Çifti i të moshuarve u grabit nga 3 persona, të cilët kanë vepruar në të njëjtën mënyrë si tek grabitja e këtij viti.
Në përshkrimet e dy pilotëve ka të përbashkëta në mënyrën e grabitjes dhe personave që kanë marrë pjesë aty, sidomos drejtuesit të grupit. Madje sipas dëshmisë së tij mund të bëhet fjalë edhe për shqiptarë.
Instruktori i Babis ka thënë se kreu i grupit ishte një person tek 170 centimetra i gjatë, me qafë të shkurtër dhe fytyrë të rrumbullakët. Fliste greqishte të mirë, por gjithashtu ka përmendur edhe disa fjalë në gjuhën shqipe. Të tre grabitësit e të dy vjedhjeve janë rreth moshës 35-vjeçare.
Në të dyja shtëpitë ata nuk kanë lënë asnjë gjurmë ADN-je apo gishtërinjsh. Instruktori nuk mohon mundësinë që shtëpitë e tyre të jenë vënë në shënjestër pasi të dy ishin punonjës në aeroport.
Por pika që i bashkon më së shumti dy historitë edhe dhuna që kanë përdorur. Instruktori i Babis tregon se në grabitjen e vitit 2018, hajdutët i bënë bashkëshortes së tij të njëjtën gjë si Caroline-s.
“Drejtuesi sulmoi gruan time njësoj si Caroline-n. I mbyllën hundën dhe gojën dhe bërtisnin ‘vriteni plakën’. Është mrekulli fakti që ajo jeton sot. Ai më tha mua ‘Puna jonë është të grabisim dhe të vrasim’”, ka treguar i moshuari i tronditur.
Ai dyshon se ngjarjet kanë lidhje me njëra tjetrën dhe se grabitjet mund të jenë kryer pas punës që ata kanë bërë në aeroport, ku hajdutët janë vënë në dijeni të parave që zotëronin.
“E kam njohur Babis prej vitesh, që kur mbaroi shkollën e mesme. Ai kishte një diplomë në drejtimin e helikopterëve ndërkohë që unë e trajnova për ta bërë pilot profesionist”, ka deklaruar instruktori.
Ai ka rrëfyer më tej, se grabitësit e shtëpisë së tij kishin qëndruar të fshehur dhe se kishin vëzhguar çdo lëvizje të tij dhe bashkëshortes.
“E dinin se kur i mbyllnim grilat. Erdhën nga krahu i djathtë i shtëpisë dhe lëvizën në vende të errëta në banesë. Pasi më morën 1100 Euro më kërkuan akoma më shumë para. U larguan pasi zbuluan bizhuteritë. Madje vranë qenin që të mos bënte zhurmë. Unë dhe ime shoqe kemi parë me qindra foto, njësoj si Babis, por nuk kemi njohur asnjë”, është shprehur ai për mediat greke.
Por më tronditëse është dëshmia e gruas e cila ka vuajtur dhunën e grabitësve. Njësoj si Caroline edhe ajo i kishte hequr maskën drejtuesit të grupit. Por kjo lëvizje shkaktoi zemërimin e tij, i cili ka bërtitur: “Vriteni plakën”.
“Fillova të bërtas dhe të kërkoj ndihmë. Më mbyllën gojën. Më hodhën në divan dhe më tërhoqën për 12 metra. Më goditën në trup dhe fytyrë. Në të njëjtën kohë drejtuesi i grupit bërtet dhe thotë “Vriteni atë”.
Kalova 22 ditë në reanimacion pasi ishte e dëmtuar rëndë. Do të vdisja nga gjakderdhja nëse bashkëshorti im nuk do të kishte shpëtuar dhe të thërriste për ndihmë”, ka treguar ajo.
Më tej, e moshuara ka shtuar se pas sulmit kanë jetuar në terror dhe mbanin gjithmonë pranë vetes një buton alarmi.
