![Shoqërimi i Fredi Belerit/ Idrizi: Reagimi i Greqisë i papranueshëm, Xhaçka t’i drejtohet me notë proteste](https://www.vizionplus.tv/wp-content/uploads/2023/05/idrizi-693x400.jpg)
Kryetari i Partisë Drejtësi Integrim dhe Unitet, Shpëtim Idrizi ka reaguar lidhur me shoqërimin e kandidatit të koalicionit “Bashkë Fitojmë”, Fredi Beleri, në komisariat.
Idrizi ka konsideruar të papranueshëm reagimin e Athinës zyrtare për këtë çështje, duke theksuar se bëhet fjalë për një shtetas shqiptar.
Kërkesën e Ministrisë së Jashtme greke për takim të ambasadores së tyre në Shqipëri me ministren Xhaçka, Idrizi e ka konsideruar si ndërhyrje të Greqisë në punë të brendshme të vendit tonë.
Ai thekson se ministrja e Jashtme, Olta Xhaçka nuk duhet të zhvillojë këtë takim, por duhet t’i drejtohet me notë proteste Athinës zyrtare.
“Vazhdojmë të pranojmë të papranueshmen!!!
Çfarë lidhje ka Ministria e Jashtme Greke me një kanditat për Bashkinë e Himarës, që është shtetas shqiptar me kombësi greke?
AdvertisementPo kandidon shteti grek në Himarë apo Fredi Bejleri?!
Ministria, znj. Olta Xhacka, nuk duhet të takojë ambasadoren greke, por t’i drejtohet me notë proteste Ministrisë së Jashtme Greke për ndërhyrje në punët e brendëshme të Shqipërisë”, shkruan Idrizi.
Pas shoqërimit të Fredi Belerit, Ministria e Jashtme greke doli në një reagim zyrtar, ku thekson se ka udhëzuar ambasadoren greke në Shqipëri që të takojë ministren Xhaçka.