Për të tretën herë, dhjetëra qytetarë janë mbledhur para Kryeministrisë për të protestuar kundër rritjes së çmimeve të ushqimeve.
I pranishëm në protestë ishte edhe një ish-minator, i cili kishte ardhur nga Shkoza. Ai u ankua se sot si pensionist merr vetëm 140 mijë lekë, shumë që nuk i del për të mbuluar as gjysmat e shpenzimeve.
“Sot kam ardhur në këmbë që nga Shkoza, marr vetëm 140 mijë lekë pension. Shohim që të gjithë kanë vila në të katër anët e Shqipërisë, unë nuk kam as një biçikletë. Kam punuar në minierë për vite me radhë, i kam dhënë miliona lekë shtetit shqiptar nga nëntoka. Ti merr 2 milionë lekë zoti kryeministër, kafen e pi me 100 mijë lekë që unë shtyj muajin. Kam kaluar Covid-19 zoti Kryeministër, kam paguar miliona, si ia bëra? Ku i gjeta? Kam hyrë në borxh. Kjo sëmundje na mori shumë të moshuar, shumë pensionistë, edhe ne që kemi ngelur, na merr na zhduk, na shfaros të mos jemi me mirë.”
