Partia Demokratike reagoi këtë të hënë për rritjen e çmimit të bukës.
Deputetja e zgjedhur demokrate, Greta Bardeli akuzoi qeverinë se është shkaktare për këtë rritje sepse i ka lënë qytetarët pa rritje page e pa subvencionet e duhura.
Sipas saj, qeveria e ndan buxhetin me oligarkët dhe nuk mendon për qytetarët e thjeshtë.
“Çmimet e ushqimeve të shportës për çdo familje shqiptare kanë ardhur në rritje. Duke filluar nga buka, qumështi e zarzavatet, çmimet po bëhen përditë e më të papërballueshme për familjet e thjeshta shqiptare! Pa rritjen e pagave, pa përdorimin e subvencioneve te duhura në bujqësi, pa uljen e çmimit të karburantit për transportin, tendenca drejt varfërisë së familjeve në vend po merr vrull dramatik! Nga ana tjetër, qeveria ndan tortën e buxhetit të shtetit me oligarkët. Paratë publike perpihen frikshëm nga zyrtarë të lidhur me grupet e kriminalizuara. PPP-të, tenderat publikë apo sekretë, janë rruga më e shpejtë e pasurimit të njëmijë njerëzve me firmë e vulë në xhepat e tyre. Paçka se vendi ynë gëzon burime natyrore, falë të cilave shqiptarët duhet të kishin pasurinë për frymë më të lartë se vendet e rajonit, familjet shqiptare kanë të ardhurat më të ulëta se çdo vend tjetër në rajon. Kjo ndodh sepse shqiptarët janë të grabitur nga një pushtet që punon kundër interesave të shumicës dërrmuese në Shqipëri! Ndodh sepse bashkë me votën, shqiptarëve u është marë perspektiva për një qeverisje më të mirë, që garanton mirëqënie për të gjithë.”
Ajo premtoi se Partia Demokratike ka një vizion dhe një program të detajuar për të rritur mirëqënien dhe për të luftuar korrupsionin.
