Ndërkohë që prej më shumë se një viti policia ende nuk e ka gjetur trupin e Jani Prengës, Gjykata e Posaçme ka liruar nga burgu Leonard Hajrin, i cili ishte i burgosur si i përfshirë në këtë vrasje.
Gjykata ka ndryshuar masën për Hajrin duke e lënë nga arrest me burg në detyrim paraqitjeje, ndërsa për Olsi Turjën, i cili akuzohet për të njëjtin krim u la arrest shtëpie.
Deri në këto momente, për rrëmbimin, masakrimin dhe zhdukjen e Jani Prengës është në burg vetëm kopshtari i kompleksit Golden, Festim Bexhdili.
Më heret, raporton Vizion Plus, kjo gjykatë la të lirë edhe Ardian Doçajn, i arrestuar gjithashtu për rrëmbimin dhe vrasjen e Jan Prengës.
Ndërsa në pranverë të vitit të kaluar u lirua edhe Bajram Hajri.
Për vrasjen e Jani Prengës, në kërkim është Altin Hajri dhe Gentian Doçaj.
Prenga u rrëmbye në Kamëz më 17 Janar të 2020, ndërkohë ende policia nuk e ka gjetur trupin e tij.
Dyshohet se Prenga u vra me urdhër të grupeve kriminale pasi kishin një prishje të pazarit të drogës të një sasie prej 283 kg kokainë me vëllain e viktimës që jeton në Angli.
