![Reforma zgjedhore/ Arrihet dakordësia e parë, kur do mblidhet komisioni. Gjiknuri zbardh detajet nga takimi me përfaqësuesit e OSBE](https://www.vizionplus.tv/wp-content/uploads/2024/01/Capture-69-658x400.jpg)
Me ndërmjetësimin e përfaqësuesve të OSBE-së, është arritur dakordësia e parë për reformën zgjedhore. Gazteraja e Vizion Plus Enkelejda Mema raporton se ditën e premte do të mblidhet komisioni për reformën zgjedhore, pas disa shtyrjeve të një pas njëshme.
Kjo gjë u arrit një ditë pasi Damian Gjiknuri dhe Enkelejd Alibeaj i drejtuar një letër OSBE-së, ku i kërkuan asistencë për implementimin e ndryshimeve e nevojshme në procesin zgjedhor duke marrë parasysh faktin se mandati i Komisionit përfundon në mars.
Tre përfaqësues të OSBE zhvilluan takime me bashkëkryetarët Enkelejd Alibeaj dhe Damian Gjiknuri në Kryesinë e Kuvendit.
Përmes një postimi në rrjetin social, Gjiknuri ka zbardhur detaje nga takimi, ku theksoi se u fol për rifillimin e punës së komisionit për reformën zgjedhore, me qëllim adresimi i rekomandimeve të OSBE/ODIHR.
“Pata kënaqësi të takoja sot përfaqësuesit e zyrës së OSBE-së në Shqipëri me të cilët diskutuam mbi procesin e reformës zgjedhore, rifillimin e punës në Komisionin e Posaçëm Parlamentar me synim adresimin në ligjin elektoral të rekomandimeve të OSBE/ODIHR dhe vendimeve të Gjykatës Kushtetuese. I falenderova për mbështetjen e deritanishme dhe për gatishmërinë për të vazhduar këtë angazhim edhe më tej, përmes ekspertizës më të mirë nga ODIHR, e cila do të ndihmojë komisionin për të arritur zgjidhjet e duhura teknike në funksion të adresimit të plotë të rekomandimeve”, shkruan Gjiknuri.
Dy janë çështjet kryesore që duhet të trajtojë komisoni: E para lidhet me heqjen e hersit dhe aplikimin e zgjedhjeve me lista të hapura dhe tjetra, gjetja e formave për të mundësuar votën emigrantëve./vizionplus.tv