Drejtori i Policisë së Tiranës, Tonin Vocaj ka reaguar në një deklaratë për mediat nga vendngjarja, për plagosjen te Komuna e Parisit.
I pyetur nga gazetari i Vizion Plus, Esido Barkaj nëse efektivi i policisë ka qëlluar me armën e shërbimit ai tha se autori ka qenë jashtë orarit të punës. Vocaj tha gjithashtu se autori ndodhet në gjendje të rënduar psikologjike.
“Probabiliteti është që ka qëlluar me armën e shërbimit. Motivet janë të dobëta. Mund të themi se autori e ka qëlluar në pjesën e poshtme të trupit, nuk tregon dashje për ta vrarë. Do të jenë ekzaminimet që do të përcaktojnë shkallën e përgjegjësisë.
Autori ka qenë jashtë orarit të punës. Kam komunikuar me efektivin, është në gjendje të rënduar psikologjike. Ne jemi duke harxhuar të gjitha energjitë për ta kapur. I bëjmë thirrje dhe përmes medias të dorëzohet”, tha Vocaj.
Bëjme me dije se Erjon Goxhara, punonjës policie me detyrë në Rinas plagosi me armë ditën e sotme 45-vjeçarin Lorenc Kosta.
Autori i dyshuar i ngjarjes është arratisur dhe ende nuk është arrestuar. Efektivi Erjon Goxhara, plagosi Kostën për motive të dobëta, pasi dyshohet se ai i ka ngacmuar partneren. /vizionplus.tv
