Reshjet intensive të shiut të rëna gjatë natës krijuan probleme në disa lagje të qytetit të Lezhës.
Përmbytjet më të mëdha ishin ne lagjen Besëlidhja. Nga reshjet u bllokuan kanalet e ujerave te zeza dhe pusetat e për pasojë uji vërshoi mbi rrugë. Si rrjedhojë u shkaktuan vështirësi në qarkullimin e mjeteve por dhe këmbësorëve.
Situata u normalizua pas zhbllokimit të pusetave.
Ndërkohë në Shkodër pati rrëshqitje dherash në Njësinë Administrative të Postribës. Për disa orë në këtë zonë u bllokua lëvizja e mjeteve në segmentin rrugor Mes – Ura e Shtrenjtë.
Autoritetet ndërhynë për pastrimin e këtij aksin ndërsa u bënë thirrje banorëve që të lëvizin me kujdes në këtë zonë.
Nga ana tjetër në zonat bregdetare u pezullua lundrimi. Era e fortë dhe dallgët e mëdha detyruan autoritetin portual të Durrësit që të mos lejojë asnjë mjet të vogël lundrues dhe asnjë anije peshkimi të dalë në det.
I njëjti vendim u mor dhe nga kapitaneria e Vlorë, e cila ndaloi dhënien e lejes për të gjitha anijet e vogla e të mesme deri në përmirësimin e kushteve të motit.