ANISA METUKU
GAZETARE/VIZION PLUS
“Ndërsa kjo fillim jave shënon edhe nisjen e vitit të ri shkollor, nuk kanë munguar problematikat. Mësimi me turne dhe oraret e shkurtuara janë dy vendimet që kundërshtohen nga prindërit.”
Advertisement
Duke marrë shkas nga këto shqetësime, një pjesë e prindërve kanë nisur plotësimin e një peticioni drejtuar ministrisë së Arsimit, për t’i thënë “JO” mësimit me turne në shkolla. Të tjerë shprehen se orët e reduktuar janë në dëm të të nxënit.
Ndërsa janë nxënësit më të vegjël ata, që e kanë pritur ditën e parë të emocionuar.
Edhe në gjimnaze procesi është organizuar me turne, duke qenë se klasat janë ndarë në dy grupe, për të ulur numrin e nxënësve në mënyrë që të respektohen distancat.
Protokolli i masave anticovid është detyrim edhe këtë vit për t’u respektuar nga të gjitha palët, si nga nxënësit ashtu edhe stafi arsimor. Mbajtja e maskës, dezinfektimi dhe ruajtja e distancës janë rregullat që do të shoqërojë procesin mësimor.
Në rast të shfaqjes së simptomave të virusit, prindërit apo nxënësit duhet t’i deklarojnë te mësuesi kujdestar, i cili në bashkëpunim me mjekun e shkollës ose atë të familjes verifikon shëndetësore e më tej merren masat e nevojshme.
Ndërsa kusht për mësimdhënien fizike në institucionet arsimore, ka qenë edhe vaksinimi i mësuesve, të cilët kanë paraqitur këtë të hënë certifikatën që vërteton marrjen e dozave.
