Zjarrvënës në Shqipëri, për avokatin Spartak Ngjela, janë të korruptuarit që shumë shpejt do të dalin para drejtësisë.
Përmes një postimi në “Facebook”, Ngjela deklaroi se ata duan të destabilizojnë shoqërinë me zjarret.
Ai kërkoi nga Struktura e Posaçme Antikorrupsion t’i godasë sa më shpejt, që Shqipëria të mos digjet më.
“Po të kishte shpejtuar SPAK në arrestimin e të korruptuarve të lartë, nuk do të kishte zjarre kaq masive sot në Shqipëri. Ata, të akuzuarit e ardhshëm për korrupsion; ata janë zjarrvënësit e kësaj kohe me zjarre masive. Ata, me zjarre masive, duan destabilizimin e shoqërisë, që, me këtë, të shmangin ndëshkimin e tyre dhe konfiskimin e pasurisë së paligjshme që kanë në zotërim. Kjo, në fakt, është dëshira e mafiozit të kapur, i cili, me krim masiv, kërkon të shpëtojë goditjen penale për krimin që ka kryer. Po SPAK, nuk e dinte këtë? Pse u vonua? Mafia është maja e karakterit kriminal të krimit të organizuar. Nuk e di SPAK këtë? Fakti që SPAK, pasi e deklaron goditjen e krimit të organizuar shtetëror në Shqipëri, nuk po kryen arrestime, kuptohet se mafia, – domethënë krimi -do të veprojë me zjarr. Ja, kjo është koha. SPAK duhet të veprojë! Shërbimet, me anë të SPAK- ut, duhet t’ia bëjë të qarë shqiptarëve se cilët janë zjarrvënësit e Shqipërisë. Kjo është arsyeja urgjente që SPAK tani duhet të fillojë goditjen penale drastike antikorrupsion, me dorë të hekurt, sepse korrupsioni dhe krimi i organizuar do të vijojë aktivitetin kriminal edhe me forma të tjera të goditjes kriminale, për destabilizimin e Shqipërisë. Shqiptarët tani po presin nga SPAK goditjen e korrupsionit, pushtuesit kriminal që po i merr frymën shoqërisë shqiptare. Shpejt!”
