Një biznesmen 43-vjeçar është zhdukur në mënyrë misterioze në Tiranë.
Ruzhdi Hoxha, banues në Paskuqan, humbi kontaktet me familjarët e tij mbrëmjen e datës se 20 tetorit. Ai doli nga banesa dhe nuk u kthye më.
Ishte djali i biznesmenit, ai që katër ditë më pas denoncoi në komisariatin numër pesë në Kamëz zhdukjen e të atit.
Por pavarësisht se kanë kaluar 17 ditë, agjentët ende nuk kanë rënë në gjurmët e 43-vjeçarit. Mësohet se Ruzhdi Hoxha ditën që u zhduk ka qenë me dy miq në një bar kafe në Kamëz.
Njëri prej tyre, ka qenë Fredi Rushi, person ky me precedent penal. Sipas burimeve pranë policisë Rushi ka qenë personi i fundit që ka pasur kontakt me 43-vjeçarin. Në dëshminë e dhënë në polici ai tregoi se pasi konsumuan kafen, biznesmeni i kishte kërkuar ta çonte me makinë në Fushë Mëzez.
Pas kësaj- ka shpjeguar ai-nuk kam më dijeni se ku mund të ketë shkuar Ruzhdi Hoxha pasi u largova për t’u takuar disa shok të tjerë.
Por ndërsa hetuesit e kanë lënë të lirë Fredi Rushin, mësohet se ai është në kërkim nga autoritetet italiane për trafik narkotikësh. Burimet thanë se ai nuk mund të arrestohej pasi nuk ka një vendim gjykate ndërsa po mbahet në monitorim.
Ndërkohë prokuroria po heton pistën e rrëmbimit. Kjo pasi 43-vjeçari, pronar i një biznesi inertesh në zonën e Kamzës, ka borxhe. Dyshohet se ai mund të jetë marrë peng ndërsa po verifikohen tabulatet telefonike.