Mediat kolumbiane kanë treguar se si iu fshihej autoriteteve Agim Çerma, baroni i drogës që transportonte kokainë me avion nga Kolumbia në Europë.
I njohur ndryshe me nofkën “Jimmi”, shqiptari kamuflohej duke jetuar si një njeri i thjeshtë, pa makinë, celular, ndërsa jetonte në një shtëpi me qira dhe përdorte gjithmonë mjete të transportit publik. Madje, ai hiqej se ishte një inxhinier civil.
Çerma u zhvendos në Kolumbi në vitin 2014, së bashku me bashkëshorten, në veri të qytetit të Barranquilla dhe prej andej filloi rrjetin e tij kriminal.
Nuk e kishte zgjedhur rastësisht këtë vend për të jetuar. Afërsia me portet kryesore do të lehtësonte trafikimin e kokainës në SHBA apo vendet europiane.
Agim Çerma është një emër i njohur edhe për drejtësinë shqiptare. Ai rezulton të jetë dënuar me burgim të përjetshëm për vrasje. Çerma është dënuar nga Gjykata e Elbasanit në vitin 1998 për vrasjen e Gëzim Liçit dhe plagosjen e efektivëve të policisë. Por, u lirua me kusht nga burgu në vitin 2012 nga gjyqtarja Parashqevi Ademi, e dënuar gjithashtu nga drejtësia në vitin 2015 për korrupsion.
