Sali Berisha është paraqitur ditën e sotme në Prokurorinë e Posaçme për të zbatuar masën e sigurisë “detyrim paraqitje” të caktuar ndaj tij nga Apeli i GJKKO-së.
Kryetari i PD-së është pritur para SPAK nga protestues të shumtë, ndërsa godina e Prokurisë së Posaçme ishte rrethuar nga një kordon policor.
Rikthimi i masës “detyrim paraqitje”
Kreu i PD-së Sali Berisha do të paraqitet sot në ambientet e SPAK pas masës së sigurisë së dhënë nga Apeli i Posaçëm.
Apeli i GJKKO caktoi më 3 Janar “Detyrim paraqitje” ndaj ish-kryeministrit të vendit. Për rrjedhojë Berisha do të duhet që të paraqitet në SPAK dy herë në muaj, të hënën e parë dhe të tretë të çdo muaji.
Për muajin janar, Berisha do të duhet të paraqitet ditën e sotme (6 Janar) para oficerit gjyqësor në Prokurorinë e Posaçme. Lidhur me masën e Apelit të GJKKO, Partia Demokratike kishte paralajmëruar protestë para ambienteve të SPAK në orë 09:30.
Në mesazhin drejtuar strukturave thuhej se demokratët duhet të protestojnë për të mbështetur të drejtën, që sipas tyre është në anën e Sali Berishës.
“Nesër, në orën 9:30, të gjithë së bashku përpara selisë së SKAP, për të protestuar kundër akteve përndjekëse që kjo vegël në duart e Ramës, bën kundrejt kundërshtarëve politikë të tij.
Do të jemi aty nesër në mbështetje të së drejtës, ligjit dhe së vërtetës, që janë në anën e liderit të opozitës, Prof. Dr. Sali Berishës. E hënë, 6 janar, ora 9:30, përpara SKAP-it”, njoftoi demokrati Flamur Noka në Facebook.
Sipas vendimit të gjyqtarit Engert Pëllumbi, Berisha duhet të paraqitet të hënën e parë dhe të tretë të muajit./vizionplus.tv
