Kryetari i Partisë Lidhja Demokratike Shqipëri në Mal të Zi, Nikollë Camaj, e quajti deklaratë për humor atë të kryeministrit malazias, Zdravko Krivokapic, se Mali i Zi do të anëtarësohet në BE vitin e ardhshëm.
“Kryeministri pothuajse nuk e kalon asnjë ditë pa sjellë një deklaratë për humor, sepse nuk është e pranueshme që një kryeministër, pa pasur asnjë parametër që të tregojë se Mali i Zi është afër integrimit europian, të deklarojë një gjë të tillë në një nivel aq të lartë”, tha Camaj në një intervistë për A2 CNN.
Ai shtoi se sot, Mali i Zi është në udhëkryq vendimtar për të ardhmen e tij, e jo më të flasë për nisma të tilla. “Ajo që po ndodh në Malin e Zi e ka larguar nga rruga e integrimit. Prandaj duhet ta marrim si lapsus apo përpjekje për të sjellë humor. Raportet e BE nuk japin shpresë ndërsa kanalet diplomatike flasin që të jemi larguar, jo të jemi afruar”.
Camaj shtoi se Ballkani i Hapur është një projekt i papranueshëm nëse nuk normalizohen më parë marrëdhëniet mes Serbisë dhe Kosovës, dhe qëndrimi i serbëve ndaj shqiptarëve në përgjithësi.
“Bindja e shqiptarëve që jetojnë në trojet jashtë kufijve të shtetit ëmë, edhe pse Ballkani i Hapur do të na afronte me të, pa u zgjidhur çështja e Kosovës na duket e papranueshme sepse pa Kosovë të barabartë me shtetet e tjera si mund të jemi të barabartë si rajon me dikë tjetër”, tha Camaj.
