”Plani Kombëtar i Rimëkëmbjes dhe Qëndrueshmërisë” është një udhërrëfyes i menduar mirë që përfshin 170 projekte, investime dhe reforma, theksoi kryeministri grek Kyriakos Mitsotakis gjatë një prezantimi të planit.
”Plani bazohet në katër shtylla: tranzicionin digjital të shtetit dhe ekonomisë, rritjen e punësimit dhe kohezionit social, ekonominë e gjelbër dhe rritjen e shpejtë të aktivitetit prodhues. Është një projekt që mbulon të gjithë Greqinë, prek çdo grek dhe greke dhe aspiron të krijojë 200 000 vende pune, por gjithashtu të rrisë PBB-në me 7,0 pikë gjatë gjashtë viteve të ardhshme”, theksoi Mitsotakis.
“Plani Kombëtar ka një karakter revolucionar sepse ndryshon modelin për të krijuar një ekonomi të hapur dhe një sistem taksash të favorshëm për rritjen dhe gjithmonë i përqendruar në të ardhmen”, theksoi kryeministri.
“Plani Kombëtar i Rimëkëmbjes krijon një jetë të re të përditshme për të gjithë qytetarët”, shtoi ai.
”Plani Kombëtar çon në një rishpërndarje të drejtë të pasurisë kombëtare. Përpjekja që fillon sot do të thotë më shumë punë, veçanërisht për të rinjtë tanë dhe një jetë të përditshme më të mirë për të gjithë”, shtoi kryeministri.