Shërbimi për Çështjet e Brendshme dhe Ankesat dha detaje plotësuese për aksionin antidrogë që u zhvillua mbrëmjen e të premtes në Tiranë.
Në prangat e policisë, përveç efektivit të RENEA-s me iniciale R. L., 27 vjeç, janë arrestuar edhe katër persona të tjerë (J.L., 30 vjeç; G.H., 26 vjeç; G.S., 27 vjeç; E.S., 26 vjeç).
Punonjësi i RENEA-s, sipas SHÇBA, drejtonte rrjetin që merrej me shpërndarjen e kokainës në kryeqytet. Grupi vepronte kryesisht në zonën e njohur si “Parku i autobusave”, Kombinatit, Misto Mame, Yzberisht dhe Qytet të Nxënësve.
Janë sekuestruar lëndë narkotike të dyshuara si kokainë dhe kanabis, para dhe armë.
Në pamjet e publikuara, duket momenti kur uniformat blu “mësyjnë” në banesa me qen antidrogë për të kërkuar lëndën narkotike dhe prova të tjera materiale.
