Varianti Delta nuk ka mbërritur akoma në Shqipëri. Kjo ishte përgjigja zyrtare e Institutit të Shëndetit Publik pas dy rasteve të dyshuara në Gjirokastër.
“Instituti i Shëndetit Publik informon se deri tani në Shqipëri nuk është identifikuar asnjë rast i variantit Delta. Pavarësisht numrit të lartë të testimeve, nuk kemi sinjale për prezencën e këtij varianti në vendin tonë. Instituti i Shëndetit Publik po monitoron me kujdes situatën e epidemisë së COVID19 në vend dhe për çdo rast të dyshuar, do të bashkëpunojë me institucionet e referencës, gjë e cila është pjesë e praktikës së punës së këtij institucioni”, thuhet në reagimin e ISHP.
Një studente nga Gjirokastra dhe një emigrant nga Përmeti u dyshuan si të infektuar me Delta, por diçka e tillë nuk u konfirmua nga autoritetet shëndetësore.
