Ish-kreu i bashkisë së Kukësit, Safet Gjici, do të qëndrojë në burg deri në përfundim të hetimeve.
Ndaj tij prokuroria e posaçme, përfaqësuar nga Manjola Kajana, ka ngritur akuzën e korrupsionit pasiv.
Përmes avokatit, Gjici i kërkoi gjykatës një masë më të butë sigurie, për shkak të problemeve shëndetësore që ai ka.
Duke mbuluar fytyrën, në Gjykatën e Posaçme u paraqit edhe 40-vjeçarja Alma Kaçi, ndaj së cilës gjykata la në fuqi “arrestin në shtëpi” për akuzën e korrupsionit aktiv, vepër penale e cila parashikon një dënim nga 1 deri në 5 vjet burgim.
Ndërsa akuza e korrupsionit pasiv për Gjicin u ngrit pas daljes së videos së dytë, ku kreu i bashkisë i premtoi vajzës me të cilën kreu marrëdhënie në zyrë se do ta favorizonte në përfitimin e një tenderi për sterilizimin e qenve të rrugës, një vepër kjo që mund të dënohet nga 4 deri në 12 vjet heqje lirie.
Videoskandali me përmbajtje erotike, që bëri xhiron e rrjetit, çoi në shkarkimin e drejtuesit të bashkisë së Kukësit, Safet Gjici, i zgjedhur për një mandat të dytë në vendoret e 14 majit.
Në një reagim në rrjetin social Facebook, Safet Gjici shigjetoi kundërshtarët politikë për përgjimin.
Nga reagimi i tij në rrjetin social Facebook, SPAK po heton edhe çështjen e një shantazhi të mundshëm ndaj ish-kryetarit.