Mjekësia Ligjore ka zbardhur shkakun e vdekjes së 32-vjecarit Lear Kurti. Sipas ekspertizës, Kurti ka ndërruar jete nga arrest kardiak i shkaktuar nga overdoza.
Burime bëjnë me dije se nga analizat është e vërtetuar se substanca e gjetur në stomakun e të riut ishte lëndë narkotike e llojit kokainë.
I riu kishte arritur pak para se të kapej nga efektivët, të gëlltiste dy qese të vogla me një sasi kokaine brenda saj. Qeset janë të përmasave 5×5, të ngjashme me ato që përdoren në farmaci për medikamentet. Sipas burimeve këto qese ishin të paktën 3 ose 4 doza kokaine.
32-vjeçari Lear Kurti humbi jetën pas shoqërimit nga policia në Komisariatin Nr.3 në Tiranë mbrëmjen e së mërkurës.
Ai tentoi t’i largohej policëve me vrap pas një kërkese për kontroll, ndërsa u arrestua disa metra më tej në zonën e Don Boskos. Pas shoqërimit në komisariat, ai shfaqi probleme shëndetësore të cilat i sollën edhe humbjen e jetës, para se të mbërrinte në spitalin e Traumës.
Lear Kurti, një emër i njohur për policinë, pasi rezulton me 3 precedentë penale, për vjedhje dhe drogë.
