“Kërkimet treguan se plazhi me ujin më blu në botë gjendet në Europë dhe përkatësisht në Shqipëri”.
Kështu bëri me dije sot kreu i qeverisë Edi Rama, duke iu referuar një shkrimi në revistën e njohur Travel+Leisure.
Revista Travel+Leisure, rrëfen se për të ndihmuar njerëzit të gjejnë ujin më blu, grupi CV Villas analizoi rreth 200 plazhe përreth botës, duke përdorur kodin RGB të ngjyrës dhe duke e kryqëzuar atë me kodin YInMn Blue ose bluja më e thellë që ekziston, e cila u zbulua në vitin 2009, nga shkencëtarët e Oregon State University në SHBA.
“Hulumtimi nxorri se Plazhi Pasqyra në jugun e Shqipërisë është plazhi me ujin më blu në botë”, shkruan kreu i qeverisë.
Revista thote se Plazhi Pasqyra është vetëm 12.4 pikë (ose gradacione) larg nuancës YInMn Blue, çka e vendos atë të parin në listë, ndjekur nga Plazhi i Gjatë (Paralia Mpouka) në Greqi, në vendin e dytë me 13.6 pikë larg YInMn Blue, e pastaj Kassiopi po në Greqi në vendin e tretë dhe Plage de la Vernette në Francë e Plazhi Kaputaş në Turqi përmbyllin pesëshen e më të mirëve.
“Morali i kësaj historie”, përfundon revista, “është se nëse dëshironi të shihni disa ujëra vërtet të kaltër, rezervoni sa më parë një fluturim për në Shqipëri dhe në Greqi”, shkruan Rama.
Artikulli i plotë i revistës Travel+Leisure
“Ky plazh në Evropë ka ujin më të kaltër në botë, sipas hulumtimit”
Për t’i ndihmuar njerëzit të gjejnë ujërat më të kaltër, CV Villas mblodhi imazhe të pafiltruara të hartës së Google të 200 plazheve anembanë globit, më pas i analizoi ato për të treguar kodin e tyre të ngjyrave RGB dhe e referoi atë me kodin e ngjyrës së nuancës më blu të certifikuar, YInMn Blue, e cila u zbulua nga shkencëtarët në Universitetin Shtetëror të Oregonit në vitin 2009.
Ekipi zbuloi se Plazhi i Pasqyrës në Shqipëri ka ujin më të kaltër në botë.
“Plazhi Pasqyra mban vendin e parë, me detin e tij që është vetëm 12.4 pikë larg nuancës YInMn Blue”, tha kompania në gjetjet e ofruara për Travel + Leisure .
“I njohur në mbarë botën si ‘Plazhi i pasqyrës’, konsiderohet të jetë një kulm i vijës bregdetare shqiptare kur rrezet e diellit bien në sipërfaqen e detit, duke krijuar një efekt të ngjashëm me pasqyrën.
Plazhi ndodhet në skajin jugor të vendit, pikërisht përballë ishullit grek të Korfuzit, dhe i vendosur midis formacioneve të mëdha shkëmbore.
Për shkak të vendndodhjes së tij, plazhi ka vetëm një restorant dhe bar, por kjo është më se e mjaftueshme për të bërë një ditë fantastike plazhi. Dhe megjithëse duhet pak përpjekje për të arritur atje, ky plazh është një perlë e fshehur, kështu që prisni të shikoni turma njerëzish nëse e vizitoni.
Plazhit të pasqyrës, i bashkohet në listën e ujërave më të kaltër Paralia Mpouka (Long Beach) në Greqi në vendin e dytë, me vetëm 13.6 pikë larg nga YInMn Blue, e ndjekur nga Kassiopi në Greqi në vendin e tretë me vetëm 14.1 pikë larg. Atyre u janë bashkuar Plage de la Vernette në Francë dhe Kaputas Beach në Turqi, duke përmbyllur pesëshen e parë. /vizionplus.tv