Pas tollovisë që është krijuar mëngjesin e sotëm para sallës “1 Tetori” në Prishtinë, zëdhënësi i LVV-së Arlind Manxhuka ka bërë të ditur se pritja e qytetarëve është vënë nën kontroll.
Manxhuka ka publikuar disa fotografi, në të cilat shihet se pranë sallës janë vendosur disa rrjeta që ndihmojnë për të mbajtur rendin e pritjes së të interesuarve për t’u vaksinuar.
“Është vendosur në kontroll pritja e qytetareve në sallën ‘1 Tetori’, që presin të vaksinohen. Fotografia është bërë në orën 12:00”, ka bërë të ditur Manxhuka në Facebook.
Mëngjesin e sotëm ka pasur radhë të gjata të qytetarëve për t’u vaksinuar në sallën “1 Tetori” në Prishtinë. Kjo ka ngjallur reagime të shumta në shoqëri, ku Qeveria është kritikuar për mosorganizim të procesit të vaksinimit.
Ndërsa, Ministria e Shëndetësisë në reagimin e saj ka bërë të ditur se tollovia në sallën “1 Tetori” është shkaktuar për shkak se qytetarë nga komunat e tjera kanë ardhur për t’u vaksinuar në Prishtinë.
