Duda Bajle, që në zgjedhjet e fundit kandidoi me partinë e saj të sapoformuar SDU dhe Emilia Rexhepi, kanë ngritur shqetësimin se deputetët e minoritetit boshnjak janë përcaktuar me votat serbe dhe me ndikim direkt nga Beogradi.
Në bazë të Kushtetutës, tri vende në Kuvendin e Kosovës janë të rezervuara për boshnjakët dhe në bazë të rezultateve paraprake, ato tri vende i kanë fituar “Ujedinjena Zajednica” e Adriana Hoxhiqit, Koalicioni Vakat dhe “Nova Demokratska Stranka” e Rexhepit.
Deputetja Rexhepi në një intervistë për portalin e Bosnjës, “Politicki.ba”, ka thënë se dy nga tre deputetët boshnjakë janë përcaktuar nga presidenti i Serbisë, Aleksandar Vuçic, që sipas saj kontrollon edhe Listën Serbe në Kosovë, e cila ka fituar të 10 mandatet e rezervuara për serbët.
Sipas saj, tani Vuçiqi ka 12 deputetë në Kuvendin e Kosovës, të cilët i kontrollon si të dojë ai.
“Plani i tyre ishte që të fitonin të tre mandatet e boshnjakëve dhe kjo u pa me votat që erdhën nga të gjitha komunat me shumicë serbe”, ka thënë Rexhepi.
“Ne nuk e shesim identitetin tonë nacional”, tha ajo.
Më herët, edhe Duda Balje, që sipas rezultateve paraprake nuk do të jetë deputete në këtë legjislaturë, ka akuzuar Listën Serbe dhe Vuçicin për këtë shtrembërim të vullnetit të qytetarëve.
“Po përgatitemi për Gjykatë Kushtetuese. Nuk pranojmë të na shisni për pazaret tuaj, kurrë”, ka shkruar ndër të tjera Balje në Facebook për këtë çështje.
Për këtë fenomen të ri, të votimit të partive boshnjake në komunat me shumicë serbe kanë folur edhe njohësit e fushës. Deri më tani nuk ka pasur një reagim nga liderët institucional.
Me 12 deputetë në Kuvendin e Kosovës, sipas pretendimit të dy deputeteve Bajle e Rexhepi, Vuçiç do të kishte një ndikim në madh, duke qenë se shpesh deputetët serbë kanë qenë përcaktues në formimin e Qeverisë.
