Prokuroria e Posaçme ka kërkuar informacion shtesë sa i takon 13 Call Center-ave që ushtrojnë aktivitetin e tyre në Tiranë, pasi dyshohet se përmes mashtrimit, kanë përfituar shumë të mëdha parash në euro.
Sipas burimeve, mësohet se këto Call Center-a, kanë mashtruar një numër të madh qytetarësh të huaj të Bashkimit Europian, përmes premtimeve të rreme duke u thënë se do të fitonin shuma parash nëse do të investonin në bursa të ndryshme. Dyshohet se janë afro 1 mijë persona kanë rënë viktimë e këtij rrjeti.
Në kuadër të këtij hetimi, organi i akuzës i ka kërkuar bankave të nivelit të dytë në Shqipëri që të mundësojnë të dhëna mbi transaksionet e kompanive në fjalë gjatë dy viteve të fundit për të bërë verifikimet përkatëse.
Ka të dhëna se bëhet fjalë për një mashtrim me vlerë disa milionë euro, të cilat qytetarët e vendeve të BE-së i kanë dërguar në llogaritë e Call Centera-ve me bazë në Shqipëri duke menduar se po investonin në bursa.
Operatorët shqiptarë prezantoheshin si përfaqësues të kompanive të njohura të bursave në BE për te krijuar besim tek klientët e tyre. Më pas operatorët u kërkonin investime në para klientëve, duke u premtuar se do të fitonin më tepër përmes bursës.
Gjermania dhe Holanda ishin dy vendet e para që shprehen shqetësim në lidhje me këtë mashtrim, ndërkohë që ka të dhëna se janë gënjyer edhe shtetas nga Italia, Franca etj.