Bien rastet e reja, por shtohen viktimat

Kjo e hënë shënoi një rënie të rasteve të reja me koronavirus, por e njëjta gjë nuk vlen për shifrat e të vdekurve.

Nga Ministria e Shëndetësisë u raportua se janë zbuluar 200 të infektuar, pas kryerjes së 2.183 testimeve.

Për fat të keq, dy qytetarë që trajtoheshin në spitalin Infektiv nuk e fituan dot betejën me sëmundjen.

Personat që kanë ndërruar jetë janë një 53-vjeçar nga Tirana dhe një 80-vjeçar nga Elbasani.

Një ditë më parë u regjistrua vetëm një viktimë dhe 397 raste të reja.

Në spital janë të shtruar 47 pacientë, kurse numri i të shëruarve brenda 24 orëve është 27.