Kryetari i Grupit Parlamentar të Partisë Socialiste Taulant Balla zhvilloi një takim me Ambasadorin e Hungarisë në Shqipëri, Lóránt Balla.
Përmes një postim në rrjetin social facebook Balla shprehet se Hungaria është një mike e mirë e Shqipërisë si dhe mes dy vendeve gjatë viteve të fundit është intensifikuar bashkëpunimi ekonomik.
“Hungaria është një mike e Shqipërisë, dhe të dy vendet tona kanë lidhje historike dhe miqësi tradicionale. Gjatë viteve të fundit është intensifikuar bashkëpunimi ekonomik, duke u konkretizuar me prezencë të rëndësishme të kompanive hungareze në sektorë të rëndësishëm të ekonomisë sonë”, deklaron Balla.
Ndërsa Ambasadori hungarez, Balla ka shprehur edhe njëherë mbështetjen e Hungarisë në procesin e negociatave dhe mbajtjen në Qershor të Tryezës së parë Ndërqeveritare Shqipëri-BE.
Postimi i plotë i Taulant Ballës:
U takova me Ambasadorin e Hungarisë zotin Lóránt Balla. Hungaria është një mike e Shqipërisë, dhe të dy vendet tona kanë lidhje historike dhe miqësi tradicionale. Gjatë viteve të fundit është intensifikuar bashkëpunimi ekonomik, duke u konkretizuar me prezencë të rëndësishme të kompanive hungareze në sektorë të rëndësishëm të ekonomisë sonë. Banka OTP në sektorin bankar dhe kompania 4iG e cila tashmë zotëron One Telecomunication dhe Albtelekom, janë shembuj konkretë të prezencës së sipërmarrjes hungareze në Shqipëri.
Ambasadori Balla rishprehu mbështetjen e Hungarisë në procesin e negociatave dhe mbajtjen në Qershor të Tryezës së parë Ndërqeveritare Shqipëri-BE. Marrëdhëniet dypalëshe janë shumë të mira. Hungaria mban zgjedhjet e përgjithshme parlamentare këtë të dielë.
Ne vlerësojmë mbështetjen e Hungarisë dhe të vendeve të Grupit Vishegradit për mbështetjen e integrimit evropian të Shqipërisë dhe të Ballkanit Perëndimor.
