Dy motra akuzuan stafin e spitalit Infektiv se nuk i ka dhënë shërbimin e nevojshëm babait të tyre, Rifat Lalo, i cili ndërroi jetë pas infektimit me koronavirus. Dy vajzat e tij pretendojnë se ai është lënë në pritje në karrigë për disa orë dhe për këtë arsye humbi jetën.
Por Qendra Spitalore Universitare “Nënë Tereza” në një reagim, pasi rasti u bë mediatik, mohoi akuzat. QSUT shtoi se mjekja roje që do i bënte shërbimin 79-vjeçarit, është vënë nën presion nga familjarët sepse ndërhynin vazhdimisht.
“Pacienti me inicialet R.L,79 vjec, ka mbërritur me urgjencë pranë Spitalit Covid 1, ora 16:30 të datës 15 Shkurt 2021, në një gjendje shumë të rënduar shëndetësore. Menjëherë është pranuar në urgjencën e Spitalit Covid 1 dhe ka marrë shërbimin e nevojshëm shëndetësor, sipas protokolleve. I është bërë skaneri në orën 17:15, është komunikuar menjëherë pas realizimit të skanerit me familjarët duke ju shpjeguar gjendjen tepër të rëndë si në aspektin klinik ashtu edhe atë imazherik. Gjendja e pacientit ka vazhduar të jetë e rënduar, ndërkohë që ka qenë gjatë gjithë kohës në oksigjenoterapi (sipas rekomandimeve edhe te mjekeve reanimatore). Ndërkohë, mjekja e rojës është gjendur vazhdimisht nën presionin dhe ndërhyrjet e familjarëve, të cilët kanë patur madje dhe një komunikim të acaruar mes tyre, në ambjentet e jashtme të spitalit, mbi vendimin për ta mbajtur apo për ta nxjerrë pacientin nga spitali dhe për ta dërguar në një shtet tjetër Europian për trajtim.”