Një tjetër efektiv policie është arrestuar në flagrancë, i akuzuar për shpërdorim të detyrës.
Sipas burimeve në pranga ka rënë efektivi Alkid Ndreu. Ky i fundit ishte specialist dhe anëtar i Komisionit të gjobave në Policisë së Tiranës.
Sipas burimeve nga organet e hetimit, Ndreu kishte marrë përmes një sekseri një shumë prej 70 mijë lekësh të reja për t’i dhënë një qytetareje patentën që e kishte të bllokuar me një afat 3 mujor. Hetimet nisën në rrugë operative nga Agjencia e Mbikqyrjes Policore e ndërsa dosja është referuar në Prokurorinë e Tiranës.
Referuar hetimeve rezultoi se shtetasja me iniciale B. D. kishte të bllokuar lejen e drejtimit nga data 24 nëntor deri më 17 shkurt të vitit 2023. Por kjo shtetase përmes rryfshetit ka arritur që të marrë lejen e saj të drejtimit.
Në pranga ka rëne gjithashtu Eduart Caka nga Kruja i cili përmes njohjeve ka marrë shumën e parave nga shtetasja B.D dhe ia ka dhënë efektivit Alkid Ndreu. Caka akuzohet për korrupsion pasiv dhe ushtrim i ndikimit tek personat me funksione publike.
Në gjëndjë të lirë, por e përballur me të njëjta akuza ndodhet edhe shtetasja B.D.
Ndërkohë vijojnë hetimet edhe për një tjetër efektiv të policisë.
Gjithashtu mësohet se është sekuestruar Kartoteka ku mbahen gjobat e bllokuara, ku po verifikohen afro 2 mijë leje drejtimi, nëse ka patur abuzime të tjerë apo jo.
