Policia e Durrësit ka identifikuar dhe shpallur në kërkim shoferin, i cili dy ditë më parë (21 gusht) aksidentoi për vdekje një 63-vjeçar në rrugën dytësore “Plepa-Kavajë”.
Pas aksidentit shoferi u largua nga vendi i ngjarjes dhe vijon të jetë në arrati.
“Pas aksidentit rrugor të ndodhur rreth orës 01:00, të datës 21.08.2024, në aksin dytësor “Plepa-Kavajë”, ku u përplas me automjet shtetasi L. D., 63 vjeç, i cili si pasojë humbi jetën, në vendngjarje, Policia Rrugore identifikoi dhe shpalli në kërkim drejtuesin e automjetit që shkaktoi aksidentin, shtetasin E. K., 22 vjeç, banues në Tiranë”, thuhet në njoftimin e policisë.
22-vjeçari, menjëherë pas aksidentit, u largua nga vendngjarja dhe braktisi automjetin, në fshatin Kodër Arapaj. Automjeti u gjet dhe u sekuestrua nga shërbimet e Policisë, në cilësinë e provës materiale.
Vijon intensivisht puna për lokalizimin dhe kapjen e këtij shtetasi./vizionplus.tv