Rëndohet situata në juglindje të vendit pas reshjeve të dëborës. Më e rëndë kjo situatë paraqitet në zonat malore aty ku trashësia e dëborës shkon deri në 30 cm. Në njësitë administrative Vithkuq e Lekas po punohet për hapjen e rrugëve të të gjitha fshatrave. Më e rënduar duket situata në fshatrat e njësive të Bashkisë së Pogradecit.
Në qoftë se kalimi në njësitë administrative Dardhas, Trebinjë e Velçan bëhet vetëm me zinxhirë, komunikimi me fshatrat e këtyre njësive është i pamundur për shkak se trashësia e dëborës ka shkuar më shumë se 30 cm bëjnë me dije burime zyrtare pranë bashkisë. Gjithashtu në fshatrat e njësivë Administrative Trebinjë e Velçan ka mungesë të energjisë elektrike.
Grupe të OSHEE po punojnë për rikthimin e energjisë elektrike. Probleme të energjisë elektrike në tensionin e ulët ka pasur për shkak të dëborës shoqëruar me erë të fortë edhe në fshatra të tjerë përfshi edhe ato të fushës së Korçës e Devollit.
Situatë e rënduar paraqitet edhe në Devollin e Sipërm si dhe në disa prej njësivë administrative të Kolonjës si dhe fshatrat e njesive Gore e Moglice ne Bashkine Maliq. Akset nacionale të juglindjes janë të kalueshme pa problem. Edhe akset e rrugëve drejt fshatrave turistikë të Dardhës dhe Voskopojës janë të kalueshme.
