Hekuran Jezerci, 19-vjeç nga Kosova ka ndërruar jetë si pasojë e COVID-19. Mediat në Kosovë bëjnë me dije se ai ka humbur betejën me virusin dy ditë më parë. I riu ishte sportist dhe nuk kishte sëmundje të tjera bashkëshoqëuese.
Arsim Jezerci thotë se në mesnatë gjendja e tij është përkeqësuar dhe pavarësisht ndërhyrjes së mjekëve ai nuk ka mundur të mbijetojë.
“Në mesnatë iu ka përkeqësuar gjendja, ka filluar frymëmarrja me iu ndalë. S’ka mujt me ecë, e kam kap në krahë, në veturë dhe këtu në Kaçanik e kemi sjell në spital.
E kanë dhënë maksimumin motrat, mjekët por me kushtet që i kanë pas s’kanë pas gjë më shumë me bo. Kemi vazhduar me emergjencë për Ferizaj. Atje e kemi lajmëruar rastin, shumë mjekë, shumë motra, me çka kanë pas motra për me ja kthyer jetën por deshti zoti e mori”, tregoi ai.
Ai i bën apel qytetarëve që të marrin vaksinën. “Kush e sheh këtë video sa më shpejt le të vaksinohet. Allahu çka e ka shkruajt aty, na s’mundemi me i ikë asaj por obligimet që ne i kemi duhet me i kry’, shtoi ai.
