Shëndeti i syve, edhe pse është një ndër gjërat më të rëndësishme në jetën tonë, shpeshherë mbetet e fundit për t’i kushtuar kujdes.
Pikërisht për këtë është folur mëngjesin e sotëm në “7pa5” me okulisten Nora Bruda.
Siç pohoi okulistja, një pjesë e mirë e shqiptarëve e bëjnë vizitën e parë të syve kur i kërkohet për çështje proceduriale, siç është përshembull patenta.
Sot, dihet që rreziku për dëmtimin e syve është më i lartë dhe kjo i atribuohet teknologjisë.
“Teknologjia luan një rol jashtëzakonisht të madh në jetën e të gjithëve. Dhe ekspozimi në smartphone për një kohë të gjatë, çon në një faktor shpërthyes që sjell probleme me pamjen. Syri nuk lejohet të bëjë punën e tij, për të parë në të gjitha largësitë. Dhe kjo ka sjellë që një pjesë e mirë e të rinjve të mbajnë syze”, shprehet Bruda.
Një dilemë tjetër që ekziston prej vitesh për shëndetin e syve është zgjedhja mes lenteve dhe syzeve.
Okulistja Nora Bruda u shpreh se edhe pse lentet rekomandohen dhe përdoren në të gjithë botën, ajo do të zgjidhte gjithmonë syzet.
“Si do që të jetë, lentet janë një trup i huaj në sy. Kanë një % rrezikshmërie për dëmtimin e syve dhe në rastin fatal edhe deri në verbim. Prandaj unë preferoj syzet, si zgjedhje e sigurt”, shprehet Bruda./vizionplus.tv