Koalicioni Vlen edhe sot në konferencë për shtyp vazhdoi me publikimin e informatave për tenderë në lidhje me kompaninë e familjes së deputetit Elmi Aziri nga Fronti Evropian.
“Dje publikuam informata për tenderët, të cilët kompania me lidhje familjare e deputetit Elmi Aziri i ka fituar nga Ministria për sistem politik dhe marrëdhënie me bashkësitë, gjatë kohës së logjistikut kryesor të BDI, Artan Grubi. Sot, vazhdojmë me publikimin e informatave të reja se si kompania e njëjtë, pronari i së cilës është nip i bashkëshortes së deputetit Elmi Aziri, ka fituar tenderë nga Komuna e Likovës, nga Shkolla e mesme “Ismet Jashari” në Likovë, nga gjimnazi “Sami Frashëri” në Kumanovë dhe IPSH – Shtëpia e Shëndetit – Kumanovë”, theksoi Bujare Abazi nga Koalicioni VLEN në konferencën e sotme për shtyp.
Këtyre katër tenderëve, kompania RITRON KOPI DOOEL- import -eksport Kumanovë, u ka dhënë ofertë për furnizim të pajisjeve kompjuterike, për të cilat i është kryer pagesë rreth 1 milion denarë.
“Këto të dhëna janë tregues i qartë se pavarësisht nga vlera e furnizimeve, pa aminin e BDI, asnjë kompani nuk mund të fitojë asnjë denar. Është e qartë se BDI ka sunduar si strukturë mafioze e cila nuk është përmbajtur nga abuzimi me mjetet financiare të popullit, për realizimin e ndikimit politik”, theksoi Abazi.
Në rrjetin e BDI, janë ngjitur të gjithë politikanët “që e konsiderojnë politikën edhe si mundësi për pasurim personal dhe familjar”.
“Andaj, e inkurajojmë udhëheqësinë e opozitarëve të Frontit Europian, ti japin shpjegim të mirë anëtarësisë, arsyen për dyshim për korrupsion politik të funksionarëve të mëparshëm të Ali Ahmetit dhe Ziadin Selës”, porositi Abazi.
The post VLEN me akuza të reja korruptive ndaj Elmi Azirit appeared first on Telegrafi.
