VLEN sot ka kërkuar nga BDI që të ndalojë me shpifje dhe manipulime të opinionit.
“Si të përkëdhelurit e LSDM-së, kjo klikë e humbur e BDI-së qartazi nuk mund ta kapërdijë dot faktin se Venko Filipçe po i braktis në mes të rrugës. Pasi çdo ditë u koordinonin si të përfitonin politikisht nga tragjedia e rëndë në Koçan, sot Bujar Osmani, si i ngarkuari për kontakt me LSDM-në, emocionalisht i dërrmuar që planet iu zbuluan, ka rifilluar të recitojë të njëjtën pllakë të vjetër e të dëgjuar me dhjetëra herë.
Në vend që të merren me shpifje dhe sulme ndaj koalicionit VLEN, ne edhe një herë i ftojmë publikisht të ndalin përhapjen e gënjeshtrave dhe manipulimeve, që s’kanë tjetër qëllim veçse të justifikojnë planet e tyre për bojkot të zgjedhjeve lokale – një përpjekje e mjerë për të krijuar krizë politike dhe për të shpëtuar vetveten.
Më në fund duhet ta kuptojnë se pikërisht për shkak të sundimit të tyre të zhytur në krim, OBRM-PDUKM fitoi 58 deputetë në zgjedhjet parlamentare të vitit të kaluar. Nuk ka plane publike apo sekrete për të larguar shqiptarët nga askund.
Ekziston vetëm frika patologjike e BDI-së nga përgjegjësia para drejtësisë për ish-zyrtarët e tyre, të cilët për dekada u pasuruan mbi shpinën e popullit shqiptar, duke na mashtruar me tregime kombëtare, ndërkohë që fshehurazi i mbushnin xhepat me marrëveshje kriminale me Gruevskin dhe Mijallkovin. Këto politika anti-shqiptare të BDI-së do të paguajnë çmimin e tyre ashpër, sepse populli ynë nuk do të lejojë të mbahet peng, vetëm pasi politikanët e llastuar të kolltukëve nuk janë mësuar të qëndrojnë në opozitë”, thonë nga VLEN./Telegrafi/
The post VLEN: BDI të ndalojë me shpifje dhe manipulime të opinionit appeared first on Telegrafi.
