Ministri i Punëve të Jashtme i Republikës së Maqedonisë së Veriut, Bujar Osmani, së bashku me Ministren e Punëve të Jashtme të Republikës së Bullgarisë, Ekaterina Zaharieva, do të bashkë-kryesojnë nesër takimin e Ministrave të Jashtëm, i cili mbahet në kuadër të presidencës së përbashkët me Procesin e Berlinit, informojnë nga MPJ e Maqedonisë.
Përveç Ministrave të Jashtëm të vendeve pjesëmarrëse në Procesin e Berlinit nga Bashkimi Evropian dhe Ballkani Perëndimor, në takim do të marrin pjesë përfaqësues të institucioneve të BE-së dhe Këshillit të Bashkëpunimit Rajonal.
“Në kuadër të sesioneve të planifikuara, Ministrat e Jashtëm do të kenë mundësi të ndajnë pikëpamjet dhe përvojat e tyre në lidhje me sfidat dhe mundësitë e Procesit të Berlinit, masat e krijuara për të ndërtuar besimin dhe për të përmirësuar bashkëpunimin rajonal, posaçërisht përmes lidhjes më të mirë dhe mobilitetit ndërmjet njerëzve nga vendet e Ballkanit Perëndimor, me fokus të veçantë të të rinjve dhe shoqërisë civile”, thonë nga MPJ.
Pas përfundimit të takimit, do të mbahet edhe konferencë e përbashkët për shtyp midis ministrave Osmani, Zakharieva dhe Maas.
“Si pjesë e presidencës së përbashkët, të njëjtën ditë do të mbahet edhe Think Thank Forum i organizuar nga Instituti për Demokraci “Societas Civilis – Shkup” në bashkëpunim me Këshillin Evropian për Politikën e Jashtme (ECFR) nga Sofja. Në kuadër të Think Thank Forumit, sipas agjendës, është paraparë që me fjalime përshëndetëse të flasin Ministrat Osmani dhe Zakharieva”, shtojnë nga atje.
Takimi është në prag të Samitit të shtatë të Procesit të Berlinit, i cili është planifikuar të zhvillohet këtë vit në 10 nëntor në Sofje, ku do të lëshohet Plani i ri i Veprimit për krijimin e një Tregu të Përbashkët Rajonal dhe Agjenda e Gjelbër për BP të cilët ishin përgatitur nën udhëheqjen e Komisionit Evropian dhe Këshillit të Bashkëpunimit Rajonal./Telegrafi/
The post Takim Osmani dhe Zakharieva në kuadër të presidencës së përbashkët me Procesin e Berlinit appeared first on Telegrafi.