Lideri i Aleancës për Shqiptarët, Ziadin Sela, ka kërkuar nga kryeministri Hristijan Mickoski që të iniciojë mbajtjen e seancës parlamentare dhe zbatimin e ndryshimeve kushtetuese për shfuqizimin e formulës “20%” për gjuhën shqipe.
“Nëse nuk ka asgjë kundër, as të tjerët të cilëve u referohet, le ta shfuqizojmë formulimin 20% dhe vetëm gjuha shqipe të jetë në Kushtetutë”, tha Sela në një konferencë për media në Kuvend.
Ai theksoi se “shqiptarët nuk kanë ardhur nga diku këtu, që dikush t’i karakterizojë me disa të drejta të përkohshme. Ata kanë qenë këtu për një kohë të gjatë dhe ky popull ka ekzistuar prej vitesh e vitesh”.
Sela tha se këtë e tregojnë edhe “kërkimet arkeologjike që dalin çdo ditë”.
Një pjesë e përfaqësuesve të opozitës shqiptare në atë kohë, tani edhe pjesë e qeverisë aktuale, përveç përfshirjes së bullgarëve në Kushtetutë, kërkuan edhe fshirjen e formulimit “20 për qind” dhe zëvendësimin e tij me “gjuhën shqipe”./Telegrafi
The post Sela: Mickoski nëse nuk është kundër gjuhës shqipe, të iniciojë heqjen e 20% appeared first on Telegrafi.