Rreth 200 mijë qytetarë në vend kanë ndonjë formë të sëmundjes së veshkave, ndërsa në dializë shkojnë 1600 pacientë në 23 qendrat nëpër shtet.
Dializa është metoda më e zakonshme në vend për trajtimin e sëmundjes renale në fazën përfundimtare kur të dy veshkat nuk mund të funksionojnë më. Pacientët kalojnë 4 deri në 5 orë për të pastruar gjakun e tyre nga të gjitha toksinat dhe uji i tepërt në trup.
Çdo të enjte të dytë të marsit, Dita botërore e veshkave shënohet në më shumë se 200 vende të botës.
Këtë vit, për shkak të pandemisë, Shoqata e qytetarëve të cilët vuajnë nga veshkat “Nefron” i anuloi të gjitha ngjarjet tradicionale dhe përqendrohet në edukimin dhe mbështetjen e fushatës së këtij viti “Jeto në mënyrë cilësore me sëmundje të veshkave”.
Sëmundja e veshkave është sëmundje jongjitëse që prek aktualisht mbi 850 milion njerëz në të gjithë botën. Një në dhjetë të rritur ka ndonjë formë të sëmundjes kronike të veshkave. Mbi 2 milion njerëz në të gjithë botën trajtohen me dializë ose transplantim. Globalisht, SKV (Sëmundja Kronike e Veshkave) po rritet çdo vit dhe parashikohet të jetë shkaku i 5-të kryesor i vdekjeve në vit në 2040./Telegrafi/
The post Rreth 200 mijë qytetarë në Maqedoni vuajnë nga sëmundjet e veshkave appeared first on Telegrafi.
