Regjistrimet në shkollat fillore dhe të mesme do të realizohen në qershor, kumtoi sot ministri i Arsimit dhe Shkencës, Arbër Ademi.
Në konferencën për shtyp në qeveri, Ademi tha se janë përgatitur protokollet konkrete për Komisionin për sëmundje ngjitëse dhe se ata presin një përgjigje nga atje, në mënyrë që të mundin më pas t’i dërgojnë ato në institucionet arsimore.
“I gjithë qershori do të jetë në dispozicion të prindërve të klasës së parë për t’i paraqitur të gjitha dokumentet në shkollat fillore ku duhet të regjistrohen fëmijët e tyre. Tashmë kemi përgatitur protokolle specifike që janë dorëzuar në Komisionin e sëmundjeve ngjitëse. Këto janë protokolle për regjistrim në arsimin fillor dhe të mesëm dhe ne presim që Komisioni të na përgjigjet”, tha Ademi.
Regjistrimi i klasave të para duhej të bëhej në maj, por u shty për shkak të situatës aktuale me koronavirusin.
Regjistrimet në shkollat e mesme do të zhvillohen sipas konkursit të shpallur në fund të marsit.
Regjistrimi në institucionet e arsimit të lartë do të bëhet në gusht dhe shtator, ndërsa deri në fund të majit qeveria duhet të marrë një vendim për kuotat për regjistrimin në universitetet shtetërore.
