Vazhdon problemi me mbeturinat në Tetovë. Kësisoj, muaji qershor i këtij viti, pothuajse si asnjëherë më parë, është duke kaluar me probleme të mëdha rreth marrjes së mbeturinave nga pikat e grumbullit brenda qytetit. Kjo situatë haset pikërisht në pikën e grumbullimit afër Stacionit policor në Tetovës, respektivisht pranë ish shkollës së mjekësisë. Në këtë vend, përveç kontejnerëve të mbushur me mbeturina, përreth tij janë hasur edhe mbeturina të amvisërisë, mobilie, eshtra të mishit dhe tekstil. Qytetarët druajnë se nëse vijohet në këtë mënyrë me menaxhimin e mbeturinave, atëherë gjatë verës mund të shfaqen edhe epidemi të ndryshme, sepse pranë kontejnerëve hasen edhe qen endacak të cilët shkarravisin edhe më shumë mbeturinat dhe i shpërndajnë gjithandej. Se pse ka vështirësi në grumbullimin e mbeturinave zyrtarët e pushtetit lokal në Tetovë ende nuk kanë dhënë ndonjë sqarim të qartë, por është evidente se ka shumë probleme rreth bartjes së mbeturinave.
Nga Ndërmarrja publike në Tetovë thonë se problem paraqesin mbeturinat inerte apo të forta, të cilat nuk e kanë vendin në këta kontejnerë. “Sa i takon lokacionit përball arkivit, ju informojmë se aty është vendosur kontejnerë 5 tonësh, i cili bartet çdo ditë nga ana e punëtorëve të Higjienës komunale. Mirëpo, kemi problem me mbeturinat inerte që hidhen jashtë kontejnerëve. Apelojmë deri tek qytetarët që mbeturinat t’i hedhin në vende adekuate që të kemi një ambient më të pastër” thotë Nazif Jashari, përfaqësues nga Ndërmarrja publike komunale në Tetovë.
Kohë më parë ishte paralajmëruar blerja e 157 kontejnerëve të rinj, të cilët do të vendosen nëpër qytet dhe vendbanime rurale për grumbullimin e mbeturinave. “Është duke u menduar që të vendosen kontejnerë nëntokësorë, të cilët do të zgjidhin këtë problem, por edhe do të lirojnë hapësirat ku janë vendosur ata dhe se kjo do të zgjidhë problemin edhe me vetëdijen e qytetarëve, që të kenë kujdes ku hedhin mbeturina, dhe kjo pritet të shihet në të ardhmen. “Tashmë janë siguruar 157 kontejnerë dhe 15 të tjerë të cilët duhet të shërbejnë për riciklimin e qelqit dhe makineri e re, me të cilën pritet të pajiset Ndërmarrja publike komunale në Tetovë e që duhet të zbusë gjendjen në teren me mbeturinat”, theksuan kohë më parë nga Komuna e Tetovës, por pa dhënë afat se kur do të fillojë blerja e këtyre kontejnerëve. Situatë e këtillë gjatë tërë këtij muaji është duke u hasur në tërë territorin e Komunës së Tetovës, kryesisht në pjesën qendrore ku hasen grumbuj me mbeturina pranë kontejnerëve. Nga Ndërmarrja publike në Tetovë për gazetën Koha shprehen se edhe pse çdo ditë mbeturinat pastrohen, megjithatë situata përsëritet për shkak të hedhjes enorme të tyre. (koha.mk)
The post Problemi me mbeturinat në Tetovë nuk gjen zgjidhje appeared first on Telegrafi.
