Ministri i Punëve të Jashtme, Bujar Osmani, mëngjesin e sotëm në margjinat e Forumit Strategjik të Bled-it, mori pjesë në takimin e organizuar nga Ministrja e Punëve të Jashtme të Sllovenisë, Tanja Fajon, në të cilin u shkëmbyen mendime për zhvillimet aktuale në Ballkanin Perëndimor, me fokus në perspektivën e saj evropiane dhe euroatlantike, bashkëpunimin rajonal, si dhe ndikimin e luftës në Ukrainë në proceset politike dhe ekonomike në rajon, njoftojnë nga MPJ.
Ministri Osmani theksoi se fillimi i negociatave për anëtarësim të Maqedonisë së Veriut në BE ka rëndësi historike, duke e pasur parasysh periudhën shtatëmbëdhjetëvjeçare të pritjes që nga marrja e statusit kandidat. Sipas Osmanit, ky akt e thekson rëndësinë e politikës së zgjerimit, si një nga projektet më të suksesshme të BE-së, në forcimin e unitetit evropian dhe konsolidimin e sigurisë, parimeve dhe vlerave demokratike në kontinentin evropian.
“Procesi i integrimit evropian e ndihmon Maqedoninë e Veriut t’i forcojë potencialet e saja demokratike, ndërsa me zgjidhjen e kontesteve me fqinjët, të sigurojë zhvillim afatgjatë dhe parashikueshmëri”, theksoi Osmani.
Në një situatë kur kontinenti është nën ndikim të efekteve më të gjera politike dhe ekonomike të krizës ushtarake në Ukrainë, por edhe nga çështjet e pazgjidhura në rajon, Osmani theksoi domosdoshmërinë e komunikimit dhe koordinimit të vazhdueshëm, si në kuadër të iniciativës B6, platformës joformale të ministrave të punëve të jashtme nga vendet e Ballkanit Perëndimor, të ngritur nga Ministri Osmani, në qershor të vitit të kaluar.
Në takim, shtojnë nga MPJ, morën pjesë edhe Ministrat e Jashtëm të Kroacisë – Gordan Grlic Radman, Bosnje dhe Hercegovinës – Bisera Turkovic, Kosovës – Donika Gërvalla Schwartz, Malit të Zi – Ranko Krivokapic dhe zv. ministrja e Jashtme e Shqipërisë – Megi Fino.
The post Osmani: Procesi i integrimit evropian e ndihmon Maqedoninë e Veriut t’i forcojë potencialet e saja demokratike appeared first on Telegrafi.