Gjithsej 300 vëzhgues afatshkurtër dhe 20 vëzhgues afatgjatë të Zyrës së OSBE-së për Institucione Demokratike dhe të Drejtat e Njeriut (ODIHR) do të vëzhgojnë zgjedhjet presidenciale dhe parlamentare në Maqedoninë e Veriut më 24 prill dhe 8 maj, njoftoi ambasadorja Jilian Stirk nga Kanadaja, e cila do të udhëheqë misionin e OSBE/ODIHR.
“Ne kemi një ekip prej 12 ekspertësh ndërkombëtarë në Shkup nga 12 vende anëtare të OSBE-së. Është një grup shumë i larmishëm. Kemi ekspertë të tjerë që punojnë në administrimin e zgjedhjeve, kuadrin ligjor, mjedisin politik, fushatën, financat politike, financimin e fushatës dhe median”, tha Stirk.
Vëzhguesit afatgjatë do të vendosen në të gjithë Maqedoninë e Veriut nga 27 prilli, në ekipe nga dy persona, në Tetovë, Ohër, Manastir, Prilep, Strumicë, Koçan, Kumanovë, Shtip. Në Shkup do të jenë dy ekipe.
Vëzhguesit afatshkurtër do të vijnë para zgjedhjeve. Ata do të vëzhgojnë qendrat e votimit në ditën e votimit dhe numërimin dhe përmbledhjen e votave.
Për sa i përket rritjes së numrit të vëzhguesve dhe nëse kanë njohuri për konflikte të mundshme, Stirk tha se numri i vëzhguesve është bazuar në rekomandimet e misionit të vlerësimit të nevojave pas vizitës në janar të këtij viti.
“Ka dy lloje zgjedhjesh në të njëjtën ditë, kështu që nuk është e pazakontë që të ketë një numër të madh vëzhguesish dhe ne po kërkonim një numër të madh vëzhguesish për të dy llojet e zgjedhjeve”, tha Stirk.
Misionit do t’i bashkohen vëzhgues nga Asambleja Parlamentare e Këshillit të Evropës dhe Parlamenti Evropian për dy ditët e zgjedhjeve, si dhe anëtarë të Asamblesë Parlamentare të OSBE-së që do të vijnë për zgjedhjet parlamentare në maj.
Nga java e ardhshme OSBE/ODIHR do të nisë monitorimin edhe të mediave.
Si pjesë e misionit, do të bëhet një vlerësim nëse zgjedhjet janë në përputhje me zotimet ndaj OSBE-së dhe detyrimet e tjera ndërkombëtare dhe me legjislacionin kombëtar.
Raporti preliminar do të publikohet më 9 prill, ndërsa dy muaj pas zgjedhjeve, OSBE/ODIHR do të nxjerrë një raport përfundimtar.
The post OSBE/ODIHR do të ketë 320 vëzhgues në zgjedhjet e dyfishta në Maqedoni appeared first on Telegrafi.
